अन्न बाँड्दै युवा

अन्न बाँड्दै युवा

कञ्चनरुप नगरपालिका– ९ की उर्मिला मगरको घरमा आज चामलको बोरा झरेपछि उनी रुन थाले । यो खुशीको आँशु थियो । कोभिड–१९ को महामारीका कारण घरमा अन्न सकिएर खान धौ–धौ परेका बेला आइपुगेको अन्नको पोका देखेर उनी रुन थालेका हुन । चामल, दाल, तरकारी, नुन, तेलसहित राहतको पोका झारेको फुड बैंकको टोलीका युवाले ‘नरुनु आमा हामि छौं नि’ भनेपछि उनी झनै भक्कानिएर रुन थाले ।

“केही नहुनेलाई आफ्नो छोराछोरी झै घरमै अन्न ल्याए, यहाँहरुको सधैं भलो होस्”, जेष्ठ नागरिक मगरको आशिर्वाद पाएपछि टोली अगाडि बढ्यो । ‘हुनेले दिएर जाऔँ, नहुनेले लिएर जाऔँ’ भन्ने नाराका साथ कञ्चन सञ्चार समूहले फुड बैंक स्थापना गरी तीन सातादेखि राहत वितरण गरिरहेको छ । कञ्चनरुप–१२ रुपनगरस्थित समूहले लकडाउनका कारण हातमूख जोर्न समस्यामा परेका अतिविपन्न घर परिवारलाई आज तेस्रो साताको खाद्यान्न राहत वितरण गरेको हो ।

पहिलो दिन ४५ परिवारलाई राहत वितरण गरेको उक्त समूहले गत साता ९५ विपन्न परिवारलाई र आज ४६ जनालाई राहत वितरण गरेको समूहका अध्यक्ष डम्बर राईले जानकारी गराए । आज राहत पाउने पवित्रा बन्जाराले पनि टोलीका सदस्यलाई दुवै हात टाउकामा राख्दै आशिर्वाद दिए । पीडितको आर्शिवाद र सहयोगीको प्रोत्साहनले नै यो अभियानले निरन्तरता पाउने कुरामा विश्वस्त रहेको समूहकी उपाध्यक्ष एवम् कार्यक्रम संयोजक रोमा लम्सालले बताए ।

सो नगरपालिकामा फुड बैंक सञ्चालनमा आएको खबर फैलिएसँगै पीडितहरु खोज्दै आइपुग्ने गरेको कार्यक्रम संयोजक लम्सालले बताए । फुड बैंकमा गए राहत पाइन्छ भनेर छिमेकीले बताएपछि फुड बैंक खोज्दै पुगेको र राहत लिएर घर फर्किएको इन्दिरा परियारले बताए ।

उनको घरमा चामल सकिएको दुई दिन भएको थियो । छिमेकीबाट पिठो मागेर रोटी पकाई छोरोछोरीलाई खुवाएको र आफूले च्युरा भिजाएर खाएको बताउनु हुँदै परियारले लकडाउनले काम पनि पाउन छाडेको बताए । फुड बैंकबाट राहत पाएपछि एक महिनालाई ढुक्क भएको उनको भनाइ थियो ।

“लामो समयदेखिको लकडाउन र निषेधाज्ञाले विपन्न मजदुरको अवस्था दयनिय बन्दै गएकाले नागरिक समाजको भूमिकाको आवश्यक्ता थियो”, समूहका सल्लाहकार उत्तम आचार्यले भने, “आवश्यक्ताले सोंच बन्यो र धेरै जनाको सोंच तथा चाहना मिलेपछि अभियान बन्यो ।”

यो अभियानमा कसैले नगद त कसैले खाद्यान्न उपलब्ध गराएर सहयोग गरिरहेको छ । सप्तरीसहित काठमाडौं, कैलाली, उदयपुर, पर्सा, बैतडी, मोरङ, नुवाकोट, सुनसरी तथा वैदेशकि रोजगारमा कतार, मलेशिया, अमेरिकामा बसेकाले समेत सहयोग गरिरहेको समूहले जनाएको छ ।

काम गर्दै गएपछि अभियानमा निकै सहयोगी हात जुट्न थालेका छन् । अन्य ठाउँमा गएर बसेका जिल्लावासी र अन्य जिल्लावासीबाट समेत सहयोग जुट्न थालेकाले तीन सातामै करिब दुई सय विपन्न परिवारलाई राहत बाँडन सकेको कोषाध्यक्ष अनील पोखरेलले बताए ।

Leave a Reply

Your email address will not be published. Required fields are marked *

Shares